«Жаңа мектепке – жаңашыл ұстаз» атты жас мамандар байқауы өтті
Қазақ мектебінің болашағы туралы М.Жұмабаев: «Әр елдің келешегі мектебіне байланысты», — деп айтып кеткендей, тәуелсіз еліміздің тарихи-әлеуметтік, мәдени-рухани болмысын дамытуға, қоғамдық өмір мен ұлттық мектепті қалыптастыруда ұстаздардың еңбегі зор. Сол себеппен №19 Д.Қонаев атындағы мектеп-гимназиясында «Жастар жылын» қолдау аясында «Жаңа мектепке – жаңашыл ұстаз» атты жас мамандар байқауы өтті. Байқауды мектеп-гимназияның әдістемелік жұмыс жоспарына сәйкес «Талапкер» жас ұстаздар мектебі ұйымдастырды.
Байқаудың негізгі мақсаты мен міндеті - жас педагогтардың әлеуметтік статусын және шығармашылық потенциалын белсендіру, әрі қарай кәсіби шеберліктерін жетілдіруіне жағдай жасау және олардың беделін көтеріп, ұстаздық мамандығына деген жастардың қызығушылығын арттыру еді.
Байқауға 3 жылға дейінгі еңбек өтілі бар 7 жас маман қатысып, өздерінің бақтарын сынап көрді. Сайыс 5 бөлім бойынша өткізілді. I бөлімде жас мамандар шеберлік сабақ пен ықшам сабақ көрсетті. II бөлімде жас мамандардың білім деңгейі біліктілік тест арқылы бағаланды. Қалған бөлімдерде жас мамандар өздерін таныстырып, жағдаяттық сұрақтарға жауап беріп, бойындағы өнері мен шығармашылық қабілеттерін көрсетті.
Байқауға директордың ғылыми-әдістемелік ісі жөніндегі орынбасары Сайлаубаев Руслан, директордың ғылыми-сараптамалық ісі жөніндегі орынбасары Хабдуллаева Гүлмира, директордың тәрбие ісі жөніндегі орынбасары Исаева Марфуға, тәжірибелі ұстаз қазақ тілі мен әдебиеті пәнінің мұғалімі Тәжкенова Гаухар және мектеп-гимназия кәсіподақ кеңесінің төрайымы Қожахметова Балзия қазылық жасады.
Қызықты да мағыналы, жақсы дәрежеде өткен байқаудың нәтижесі бойынша бастауыш сынып мұғалімі Аймаханова Жанар «Бас жүлдені» жеңіп алса, информатика пәнінің мұғалімі Әмірханова Ақтолқын I орынды иеленді. II орынды бастауыш сынып мұғалімі Махмутова Анаркүл, ІІІ орынды биология пәнінің жас маманы Махашова Мөлдір қанжылады. Егізбаева Тоғжан «Шығармашыл ұстаз», Төребекова Сара «Жаңашыл ұстаз», Кибраева Алима «Ізденімпаз ұстаз» номинациялары иеленді. Байқау қорытындысы бойынша мектеп-гимназия директорының м.а М.Алимбеков пен қазылар алқасы жеңімпаздарды марапаттап, кәсіподақ комитеті дайындаған арнайы сыйлықтарын табыстады.
Жас мамандарды жеңістерімен мектеп-гимназияның ұстаздар қауымы шын жүректен құттықтайды. Жүрегінде балаға деген мейірім шуағы бар жандар ғана ұстаз бола алады. Сондықтан біздің жас мамандарымыз оқушыларға жан-жақты білім беріп қана қоймай, оқушылардың өз бетінше ізденуіне дайындайды. Болашақ — жастардың қолында. «Елді түзетуді бала оқыту ісін түзетуден бастау керек», — деп Ахмет Байтұрсынов айтып кеткендей, ел ертеңі — ақылына білімі сай Тәуелсіз елдің жастары. Сондықтан да жауапкершілікті терең сезініп, жас мамандарға әрқашан сенім биігінен жоғары шығуына тілектеспіз.
Руслан Сайлаубаев
Директордың ғылыми-әдістемелік
жұмысы жөніндегі орынбасары